I mind on fan ye wir granite an blue lift
a solid bawk tae lean ane’s bek agin,
ae sunny sky tae lift ane’s speirits hei
haird wark, an canny ease.
 
Aye haird wark cam easy yon dey lang syne
fan sun an raen melled intae clementine,
saft wund taiglet oot the blustrin gale,
guid times yon in a faur awa isle.
 
But the granite rock crummlet intil grush
an a caul wun hairdens the happit bane,
a dim ee caas canny ower the wey aheid,
simmer an blue nae langer tak the lead.

 

George T Watt